ઇંગ્લેન્ડના કેપ્ટન બેન સ્ટોક્સ ભારત સામેની છેલ્લી ટેસ્ટ રમશે નહીં. તેના જમણા ખભામાં ઈજા થઈ છે. ઇંગ્લેન્ડના કેપ્ટને માન્ચેસ્ટર ટેસ્ટના ચોથા દિવસે બોલિંગ કરી ન હતી. તેને ખેંચાણની પણ તકલીફ જોવા મળી હતી.
ECBએ બુધવારે પ્લેઇંગ-11 રિલીઝ કરતી વખતે સ્ટોક્સની ઇજા વિશે માહિતી આપી હતી. બોર્ડે જણાવ્યું હતું કે સ્પિનર લિયામ ડોસન, જોફ્રા આર્ચર અને બ્રાયડન કાર્સ પણ 31 જુલાઈથી લંડનના ઓવલ મેદાન પર શરૂ થનારી આ મેચનો ભાગ રહેશે નહીં.
માન્ચેસ્ટર ટેસ્ટમાં રિટાયર્ડ હર્ટ, ચોથા દિવસે બોલિંગ ન કરી
માન્ચેસ્ટર ટેસ્ટના ત્રીજા દિવસે બેન સ્ટોક્સને સતત ખેંચાણ થઈ રહી હતી. આવી સ્થિતિમાં, તે 66 રન પર રિટાયર્ડ હર્ટ થયો હતો. ડ્રેસિંગ રૂમમાં તપાસ કરાવ્યા પછી તે બેટિંગમાં પાછો આવ્યો અને દિવસની રમતના અંતે 77 રન બનાવીને અણનમ પાછો ફર્યો. તે ચોથા દિવસે 141 રન બનાવીને આઉટ થયો હતો. આ દિવસે, તેણે બીજા અને ત્રીજા સત્રમાં બોલિંગ કરી ન હતી. જોકે, સ્ટોક્સે મેચના છેલ્લા અને પાંચમા દિવસે 11 ઓવર ફેંકી અને એક વિકેટ લીધી.
સ્ટોક્સની જગ્યાએ ઓલી પોપ ઈંગ્લેન્ડની કેપ્ટનશીપ કરશે
ECBએ જાહેર કરેલી પ્લેઇંગ-11 મુજબ, ઓલી પોપ ઇંગ્લિશ ટીમનું નેતૃત્વ કરશે. પોપે ભારત સામે લીડ્સ ટેસ્ટની પહેલી ઇનિંગમાં સદી ફટકારી હતી. તેણે માન્ચેસ્ટર ટેસ્ટમાં ઇંગ્લેન્ડ માટે 71 રનની ઇનિંગ રમી હતી.
ફાસ્ટ બોલર્સની ત્રિપુટી ઇંગ્લિશ ટીમમાં પરત ફરી
છેલ્લી મેચ માટે ઇંગ્લેન્ડની ટીમમાં 3 ઝડપી બોલરો પાછા ફર્યા છે. જેમાં ગસ એટકિન્સન, જીમી ઓવરટન અને જોશ ટોંગનો સમાવેશ થાય છે. જોફ્રા આર્ચર અને બ્રાયડન કાર્સને પ્લેઇંગ-11માં આરામ આપવામાં આવ્યો છે.
ઇંગ્લેન્ડની પ્લેઇંગ-11
ઓલી પોપ (કેપ્ટન), ઝેક ક્રોલી, બેન ડકેટ, જો રૂટ, હેરી બ્રુક, જેકબ બેથેલ, જેમી સ્મિથ (વિકેટકીપર), ક્રિસ વોક્સ, ગસ એટકિન્સન, જીમી ઓવરટન, જોશ ટંગ.
છેલ્લી ટેસ્ટ 31 જુલાઈથી ઓવલ ખાતે શરૂ થશે
ભારત અને ઇંગ્લેન્ડ વચ્ચે તેંડુલકર-એન્ડરસન ટ્રોફીની પાંચમી અને અંતિમ ટેસ્ટ 31 જુલાઈથી ઓવલ ખાતે રમાશે. ભારત સિરીઝમાં 1-2 થી પાછળ છે અને ઓવલ ટેસ્ટ જીતીને શ્રેણી બરાબર કરવા માગે છે.