સલમાન ખાનની રૂમર્ડ ગર્લફ્રેન્ડ યુલિયા વંતુરને બોલિવૂડમાં કરિયર બનાવવાની કોઈ યોજના નહોતી. તે રોમાનિયામાં પોતાનું કરિયર બનાવી રહી હતી, પરંતુ જ્યારે તે ડબલિનમાં ‘બોડીગાર્ડ’ના શૂટિંગ દરમિયાન સલમાન ખાનને મળી, ત્યારે તેણે મુંબઈ આવવાનું નક્કી કર્યું. કહેવાય છે કે, સલમાન ખાને ખુદ યુલિયા વંતુરને મુંબઈ બોલાવી હતી. 2011માં યૂલિયા તેના બોયફ્રેન્ડ સાથે મુંબઈ આવી હતી, પરંતુ તેમનું બ્રેકઅપ થઈ ગયું હતું. આ પછી સલમાન ખાને તેની ઘણી મદદ કરી.
સલમાન ખાન અને યુલિયા વંતુર વચ્ચે ઘણાં વર્ષોથી અફેર હોવાના અહેવાલો છે. બંને ઘણી વખત ઈવેન્ટ્સ, પાર્ટી અને ફેમિલી ફંક્શનમાં સાથે જોવા મળ્યા છે. લોકડાઉન દરમિયાન તે સલમાન સાથે તેના ફાર્મહાઉસમાં પણ રહી હતી.
તેમના લગ્ન વિશે અવારનવાર ચર્ચાઓ થતી રહે છે, પરંતુ બંનેએ ક્યારેય તેમના સંબંધોને જાહેરમાં સ્વીકાર્યા નથી. જોકે યુલિયા વંતુરના લગ્ન વિશે એવો દાવો કરવામાં આવે છે કે તેણે રોમાનિયન ગ્રેમી-નોમિનેટેડ સિંગર મારિયસ મોગા સાથે લગ્ન કર્યાં હતાં. લગભગ 4 વર્ષ સાથે રહ્યા બાદ બંને અલગ થઈ ગયાં હતાં.
આજે યુલિયા વંતુરના જન્મદિવસ પર ચાલો જાણીએ તેના જીવન અને કરિયર સાથે જોડાયેલી કેટલીક ખાસ વાતો…
24 જુલાઈ 1980ના રોજ રોમાનિયામાં જન્મેલી મૉડલ, ટીવી પ્રેઝેન્ટેટર, પ્રોફેશનલ સિંગર યુલિયાએ 15 વર્ષની ઉંમરે મૉડલિંગ શરૂ કર્યું. યૂલિયા રોમાનિયામાં સૌથી વધુ લોકપ્રિય અને સૌથી લાંબા સમય સુધી ચાલતા લાઇવ ટીવી શૉ ‘ધ સેલિબ્રિટી’માં કો-પ્રેઝેન્ટેટર તરીકે જાણીતી છે. ત્યારબાદ તેણીએ પ્રાઇમ ટાઇમ અને વીકેન્ડ ન્યૂઝ પ્રેઝેન્ટેટર તરીકે કામ કર્યું. તેણીને ટેલિવિઝનમાં તેના કામ માટે ઘણા પુરસ્કારો પ્રાપ્ત થયા છે અને યૂલિયા વંતૂર એવા કેટલાક ટીવી સ્ટાર્સમાંની એક માનવામાં આવે છે, જે ફક્ત લાઇવ શો રજૂ કરવામાં નિષ્ણાત છે.
ટીવી એન્કર બનવાની સફર
એક ઈન્ટરવ્યૂ દરમિયાન પોતાની જર્ની વિશે વાત કરતા યુલિયા વંતુરે કહ્યું, ‘જ્યારે હું પહેલીવાર ન્યૂઝરૂમમાં પહોંચી, ત્યારે હું માત્ર 19 વર્ષની હતી. મેં સાંભળ્યું હતું કે ચેનલને એન્કરની જરૂર છે. મેં ત્યાં મારો સીવી આપ્યો. મને કહેવામાં આવ્યું કે નિર્માતાને સોનેરી વાળ પસંદ નથી, તેથી પસંદગીની શક્યતા ઓછી છે. તે સમયે, ચેનલના નિર્માતા ત્યાંથી પસાર થઈ રહ્યા હતા, જ્યારે તેમને ખબર પડી કે મારે એન્કર બનવું છે, ત્યારે તેમણે મને પૂછ્યું કે શું હું તરત જ ટેસ્ટ આપી શકું?’
‘હું યુવાન અને શરમાળ હતી, છતાં પણ મને નોકરી મળી ગઈ. તે પછી મેં 15 વર્ષ સુધી ન્યૂઝ એન્કર તરીકે કામ કર્યું. સમાચારો લખવા, સંપાદન કરવું, ઇન્ડિપેન્ડન્ટ રહેવું અને વર્કિંગ વુમન બનવું, આ બધું મારા જીવનનો એક ભાગ બની ગયું. મેં 8 વર્ષ સુધી ‘ડાન્સિંગ વિથ ધ સ્ટાર્સ’ શો હોસ્ટ કર્યો છે.’
માતાપિતાએ વિચાર્યું કે તે મેજિસ્ટ્રેટ બનશે
યુલિયા તેના માતાપિતાનું એકમાત્ર સંતાન છે. તે કહે છે, ‘મારા માતા-પિતા મારા પ્રત્યે ખૂબ કાળજી રાખનારા અને રક્ષણાત્મક છે. જ્યારે તેઓ મારા અંગત જીવન વિશે આવી વાતો સાંભળે છે, ત્યારે તેઓ પરેશાન થઈ જાય છે.’
યુલિયા વંતુર પહેલીવાર સલમાન ખાનને 2010માં ડબલિનમાં મળી હતી.તે સમયે સલમાન ખાન ત્યાં ફિલ્મ ‘બોડીગાર્ડ’નું શૂટિંગ કરી રહ્યો હતો. એવું કહેવાય છે કે યુલિયા સલમાન ખાનને મળ્યા પછી જ ભારત આવી હતી.
લોકો તેને યૂલિયા નહીં પણ લૂલિયા કહે છે
યુલિયા વંતુર કહે છે, ‘ભારતમાં મને કોઈ ઓળખતું ન હતું. અહીં લોકો મને લૂલિયા કહીને બોલાવતા હતા. જ્યારે મારું નામ I થી શરૂ થાય છે. મારી ગણતરી રોમાનિયાની પ્રતિષ્ઠિત વ્યક્તિઓમાં થાય છે. લોકો મારા જીવન અને મારી જર્ની વિશે જાણતા ન હતા. લોકોએ મને માત્ર એક છોકરી તરીકે જ જોઈ, જેનું બોલિવૂડમાં આવવાનું મોટું સપનું છે. જોકે, મારી આવી ઈચ્છા ક્યારેય નહોતી.’
બોયફ્રેન્ડ સાથે મુંબઈ પહોંચી અને પછી બ્રેકઅપ થઈ ગયું
2011માં યુલિયા તેના બોયફ્રેન્ડ મારિયસ સાથે મુંબઈ આવી હતી પરંતુ તેમનું બ્રેકઅપ થઈ ગયું. આ પછી સલમાન ખાને તેની ઘણી મદદ કરી, ત્યાર બાદ યુલિયાનું કરિયર આગળ વધવામાં સફળ રહ્યું. યુલિયા ઘણીવાર સલમાન અને તેના પરિવાર સાથે જોવા મળે છે. લોકડાઉન દરમિયાન પણ યુલિયા સલમાન સાથે તેના ફાર્મહાઉસ પર હતી. આ દરમિયાન તેના કેટલાક ફોટો અને વીડિયો પણ સોશિયલ મીડિયા પર વાયરલ થયા હતા.
શું યુલિયા વંતુર પરિણીત છે?
મિસ માલિની (એન્ટરટેઈનમેન્ટ વેબસાઇટ)ના અહેવાલ મુજબ, ‘યુલિયાએ રોમાનિયન ગ્રેમી-નોમિનેટેડ સિંગર મારિયસ મોગા સાથે લગ્ન કર્યાં હતાં. લગભગ 4 વર્ષ સાથે રહ્યા બાદ બંને અલગ થઈ ગયાં.’ આ સાથે, યૂલિયા અને તેના પૂર્વ પતિ મારિયસની ઘણી તસવીરો સોશિયલ મીડિયા પર જોવા મળી હતી, જેણે તેમના લગ્નના સમાચારની પુષ્ટિ કરી હતી.
જો કે, યૂલિયાએ લગ્નના સમાચાર પર પોતાનું મૌન તોડ્યું અને તેને અફવા ગણાવી. ઈન્સ્ટાગ્રામ પર એક પોસ્ટ શેર કરતા તેણે લખ્યું, ‘પ્રિય મિત્રો, મને ક્યારેય કોઈ અફવાઓ પર પ્રતિક્રિયા આપવાની જરૂર નથી લાગી, પરંતુ હવે મને લાગે છે કે મારે સ્પષ્ટપણે કહેવું જોઈએ કે મેં ક્યારેય લગ્ન કર્યા નથી. મને મારા લગ્નનો પોશાક પહેરવાની કોઈ ઉતાવળ નથી. ભગવાન આપણા બધાનું ભલું કરે!’
બોલિવૂડમાં કરિયર બનાવવાનો કોઈ પ્લાન નહોતો
યુલિયાએ ઘણી ફિલ્મોમાં ગીતોને પોતાનો અવાજ આપ્યો છે. એક ઈન્ટરવ્યૂ દરમિયાન યૂલિયાએ કહ્યું હતું, ‘કામ માટે ભારત આવવાનો મારો કોઈ પ્લાન નહોતો. મેં ક્યારેય વિચાર્યું ન હતું કે જીવન મને ભારત તરફ ખેંચશે, પરંતુ મેં મારા હૃદયની વાત સાંભળી અને આજે હું અહીં છું.’
સલમાન ખાને રસ્તો બતાવ્યો
‘સલમાન ખાન મારો સારો મિત્ર છે અને તેણે મને રસ્તો બતાવ્યો, મને ગાવા માટે પ્રોત્સાહિત કરી. મેં ક્યારેય વિચાર્યું ન હતું કે, હું હિન્દીમાં ગીત ગાવા સક્ષમ થઈશ, પરંતુ તેણે મને ખૂબ સપોર્ટ કર્યો. તેમના કારણે મેં ગાવાનું શરૂ કર્યું.’
નોંધનીય છે કે, હિમેશ રેશમિયા સાથે ‘એવરી નાઈટ એન્ડ ડે’ સિવાય યુલિયાએ અત્યાર સુધી સલમાન ખાનની ફિલ્મ ‘રાધેઃ યોર મોસ્ટ વોન્ટેડ ભાઈ’માં ‘સીટીમાર’, ‘રેસ 3’માં ‘સેલ્ફિશ’, ‘પાર્ટી ચલે ઓન’, ‘સિકંદર’માં ‘લગ જા ગલે’ જેવા ઘણા ગીતો ગાયા છે.
સલમાન ખાન સાથેના સંબંધો વિશે યૂલિયા વંતૂરે શું કહ્યું?
કેટરીના કૈફથી અલગ થયા બાદ સલમાન ખાનનું નામ યુલિયા વંતૂર સાથે જોડાયું છે. બંને લાંબા સમયથી સાથે છે અને ઘણીવાર સાથે જોવા મળે છે. જોકે, બંનેએ ક્યારેય પોતાના સંબંધો વિશે ખૂલીને વાત કરી નથી. યૂલિયા વંતૂરે તાજેતરમાં ફિલ્મફેરને આપેલા ઇન્ટરવ્યૂમાં સલમાન ખાન વિશે વાત કરી.
‘મને મારી જાત પર વિશ્વાસ નહોતો’
યુલિયાએ કહ્યું હતું, ‘દરેક માટે ભાવનાત્મક સમર્થન ખૂબ જ મહત્વપૂર્ણ છે અને તમારા અવાજમાં વિશ્વાસ રાખનાર વ્યક્તિ હોવો ખૂબ જ મહત્વપૂર્ણ છે. સલમાન ખાન એક એવો વ્યક્તિ હતો, જેને મારા અવાજ અને મારી પ્રતિભા પર વિશ્વાસ હતો. જ્યારે મને મારી જાત પર શંકા હતી, ત્યારે પણ તેણે મને આ માટે ખૂબ પ્રોત્સાહિત કરી.’
‘જો કે, મારા જીવનમાં એવી ક્ષણો પણ આવી છે, જ્યારે મારું આટલું સારું સ્વાગત થયું ન હોય. હું અચાનક હિન્દી ગીતો ગાવા લાગી અને મારી પાસે
એવા લોકો હતા, જેઓ ખરેખર મારામાં વિશ્વાસ કરતા હતા. તેઓ મારામાં મારા કરતાં વધુ વિશ્વાસ કરતા હતા અને તે મારા માટે સૌથી મહત્ત્વની બાબત હતી. તે માટે હું ખરેખર તેમનો આભારી છું.’
સલમાન ખાન સાથે લગ્નની વાત પર યુલિયાની પ્રતિક્રિયા
સલમાન ખાન સાથે યુલિયાના લગ્નના સમાચાર અવારનવાર સાંભળવા મળે છે. યુલિયાએ કહ્યું હતું- ‘મેં પણ આ અફવાઓ વિશે સાંભળ્યું છે. હવે હું લોકોને વાર્તાઓ બનાવતા રોકી શકતી નથી. મને સલમાન માટે ઘણું સન્માન છે અને સાથે જ જીવન મને ક્યાં લઈ જઈ રહ્યું છે, તેનો મને ખ્યાલ નથી. હું મારા જીવન માટે ઘણી યોજનાઓ બનાવતી હતી, પરંતુ કેટલીકવાર આપણને જે જોઈએ છે, તે જીવનમાં થતું નથી.
સલમાન યુલિયા વંતુરના પિતાના જન્મદિવસ પર પહોંચ્યો હતો
2024માં, સલમાન ખાન યુલિયા વંતુરના પિતાનો જન્મદિવસ ઉજવવા દુબઈ પહોંચ્યો હતો. યુલિયાએ સોશિયલ મીડિયા પર જન્મદિવસની ઉજવણીની તસવીરો શેર કરી હતી. તે જ સમય દરમિયાન, સલમાને તેની ‘દબંગ રીલોડેડ ટુર’ માટે દુબઈમાં પરફોર્મ કર્યું હતું. ગેંગસ્ટર લોરેન્સ બિશ્નોઈ તરફથી ધમકીઓ મળ્યા બાદ સલમાન ખાનનો આ પહેલો વૈશ્વિક પ્રવાસ હતો.
‘રાધા ક્યોં ગોરી મેં ક્યોં કાલા’થી બોલિવૂડમાં ડેબ્યૂ કરવાની હતી
યૂલિયા વંતૂર હિન્દી ફિલ્મ ‘રાધા ક્યોં ગોરી મેં ક્યોં કાલા’થી બોલિવૂડમાં એક્ટર તરીકે ડેબ્યૂ કરવાની હતી. જ્યારે મેકર્સે આ ફિલ્મનું પોસ્ટર રિલીઝ કર્યું, ત્યારે સલમાન ખાને તેના ટ્વિટર હેન્ડલ પરથી ફિલ્મનું પોસ્ટર શેર કર્યું હતું. જેને યૂલિયાએ રિટ્વીટ કર્યું હતું. જેમાં તે કૃષ્ણ ભક્તની ભૂમિકામાં જોવા મળી હતી. આ ફિલ્મનું દિગ્દર્શન પ્રેમ સોની કરી રહ્યા હતા, જેમણે અગાઉ સલમાન ખાનની ફિલ્મ ‘મિસ્ટર એન્ડ મિસિસ ખન્ના’ ડિરેક્ટ કરી હતી. કહેવાય છે કે, ફિલ્મનું શૂટિંગ શરૂ થાય તે પહેલા જ બંધ કરી દેવામાં આવ્યું હતું. એવી ચર્ચા હતી કે સલમાન યૂલિયાને લોન્ચ કરવા માટે બીજી ફિલ્મ શોધી રહ્યો છે.
MeToo ચળવળને સમર્થન આપ્યું હતું
એક્ટ્રેસ કૃતિકાએ ફિલ્મ ‘રાધા ક્યોં ગોરી મેં ક્યોં કાલા’ના કાસ્ટિંગ ડિરેક્ટર વિકી સિડાના પર બળાત્કારનો પ્રયાસ કરવાનો આરોપ લગાવ્યો હતો. આ પછી ફિલ્મના નિર્માતાઓએ વિકી સિડાના સાથે સંબંધો તોડી નાખ્યા. MeToo કેમ્પેઈનને લઈને યુલિયાએ કહ્યું હતું , ‘હું આ કેમ્પેનને સપોર્ટ કરું છું. આ એક ખૂબ જ ગંભીર મુદ્દો છે પરંતુ આપણે ધ્યાનમાં રાખવું જોઈએ કે તેનો કોઈપણ કિંમતે દુરુપયોગ થવો જોઈએ નહીં. ઘણી વખત તેના હેઠળ લાગેલા આરોપોને કારણે વ્યક્તિનું જીવન બરબાદ થઈ શકે છે. બીજી તરફ હું કહીશ કે કોઈપણ મહિલાએ પોતાની સાથે થઈ રહેલા શોષણ સામે અવાજ ઉઠાવવો જોઈએ, પરંતુ આ અવાજ અત્યંત જવાબદારી સાથે ઉઠાવવો જોઈએ.’
તે એક શોર્ટ ફિલ્મમાં એક્ટ્રેસ તરીકે જોવા મળશે
હાલમાં યુલિયા વંતુર ટૂંકી અંગ્રેજી ફિલ્મ ‘ઇકોઝ ઓફ અસ’માં કામ કરી રહી છે. જો રાજનના ડિરેક્શનમાં બની રહેલી આ ફિલ્મમાં યૂલિયા વંતૂર ઉપરાંત દીપક તિજોરી અને સ્પેનિશ એક્ટ્રેસ એલેસાન્ડ્રા વ્હીલન મેરેડિઝની પણ મહત્વની ભૂમિકા છે. એક્ટ્રેસ પૂજા બત્રા એલાયન્સ મીડિયા પ્રાઈવેટ લિમિટેડ સાથે મળીને આ ફિલ્મનું નિર્માણ કરી રહી છે.