ભારતીય વિકેટકીપર બેટ્સમેન રિષભ પંત ઇંગ્લેન્ડ સામે રમાઈ રહેલી ટેસ્ટ સિરિઝમાંથી બહાર થઈ શકે છે. ચોથી ટેસ્ટના પહેલા દિવસે પંત ઈજાગ્રસ્ત થયો હતો. મીડિયા રિપોર્ટ્સ અનુસાર, તેના અંગૂઠામાં ફ્રેક્ચર થયું છે અને તેને 6 અઠવાડિયાનો આરામ આપવામાં આવ્યો છે.
મીડિયા રિપોર્ટ્સ અનુસાર, સ્કેન રિપોર્ટમાં ફ્રેક્ચર દેખાયું છે અને તે છ અઠવાડિયા માટે બહાર છે. મેડિકલ ટીમ એ જોવાનો પ્રયાસ કરી રહી છે કે શું તે પેઇનકિલર્સ લીધા પછી બેટિંગમાં પાછો આવી શકે છે. જો કે, તેને હજુ પણ ચાલવા માટે ટેકાની જરૂર છે અને તેના બેટિંગની શક્યતા ખૂબ ઓછી છે.
ઈજાગ્રસ્ત થયા બાદ રિષભ પંત નિવૃત્ત થયો
માન્ચેસ્ટર ટેસ્ટના પહેલા દિવસે 68મી ઓવરમાં ભારતના વિકેટકીપર બેટ્સમેન રિષભ પંત ઘાયલ થયો હતો. ઓવરના ચોથા બોલ પર ક્રિસ વોક્સે ધીમો યોર્કર ફેંક્યો હતો. પંત રિવર્સ સ્વીપ રમવા ગયો હતો, પરંતુ બોલ તેના બેટ પર અને પછી તેના જૂતા પર વાગ્યો. ઇંગ્લેન્ડે LBW માટે અપીલ કરી, પરંતુ અમ્પાયરે નોટ આઉટનો નિર્ણય આપ્યો.
પંત પીડાથી કણસતો જોવા મળ્યો. ફિઝિયો ટીમ તેને તપાસવા માટે મેદાનમાં આવી. પંતનો દુખાવો ઓછો થયો નહીં, જ્યારે તેણે જૂતા કાઢ્યા ત્યારે તેના પગમાં સોજો જોવા મળ્યો. ત્યારબાદ તેને સ્ટ્રેચર વાનમાં બહાર કાઢવામાં આવ્યો. તે 37 રનના સ્કોર પર રિટાયર્ડ હર્ટ થયો. તેણે સાઈ સુદર્શન સાથે ચોથી વિકેટ માટે 72 રનની ભાગીદારી કરી.
